Presidential

तिवारीका हत्यारालाई कारबाही नगरे देशै ठप्प बनाउँछौँः राजीव पहारी

तिवारीका हत्यारालाई कारबाही नगरे देशै ठप्प बनाउँछौँः राजीव पहारी

युवा संघ रुपन्देहीका अध्यक्ष दुर्गा तिवारीको हत्या के कारणले भएको ठान्नु हुन्छ ?

तिवारीको हत्या राजनीतिक कारणले भएको हो । राष्ट्रिय अखण्डता, सार्वभौममिकता र स्वतन्त्र राष्ट्रका रुपमा नेपाललाई बचाई राख्न चाहने तिवारीलाई देशलाई विखण्डन गर्न खोज्ने तत्वहरुले हत्या गरेका हुन् । उहाँ राष्ट्रिय अखण्डता, सार्वभौमिकता र स्वतन्त्र राष्ट्रका रुपमा नेपाललाई बचाई राख्न सतिसालझैं उभिँदै आउनुभएको थियो ।

प्रदेश नम्बर पाँचलाई पहाडबाट अलग तुल्याउनु हुँदैन भन्दै विगत केही हप्तादेखि रुपन्देहीलगायतका जिल्लामा ठूलो जनसागर उर्लिएको छ । रुपन्देहीको आन्दोलनको नेतृत्व उहाँले नै गर्नुभएको थियो । जसका कारण विखण्डनकारी, विभाजनकारी प्रवृत्ति बोकेका र त्यही सोच भएका केही व्यक्तिहरुद्वारा उहाँको हत्या भएको हो ।

उहाँको हत्याप्रति युवा संघ घोर निन्दा र भत्र्सना गर्दछ । उहाँको हत्या भएको २१ घण्टा बितिसक्दा पनि सरकारले हत्यारा पत्ता लगाउन र समात्न सकेको छैन । युवा संघले आजै गृहमन्त्री विमलेन्द्र निधिलाई भेटेर अपराधीलाई कारबाही गर्न भनिसकेको छ ।

सरकारले छानविन आयोग गठन गरिसकेको छ । यो अवस्थामा तपाईहरु आन्दोलनमा जानु हुन्छ ?

युवा संघले आज पाँच बजेभित्र आयोग गठन नगरे आन्दोलनको आँधीबेहोरी ल्याउने चेतावनी दिएको थियो । युवा संघले चेतावनी दिएलगत्तै एआइजी विज्ञानराज शर्माको नेतृत्वमा छानविन आयोग गठन भएको छ ।

तपाईहरुकै दबाबपछि गृहमन्त्री छानविन आयोग बनाउन बाध्य भएका हुन त ?

हामीले गृहमन्त्रीलाई तीन वटा कुरा भनेका थियौँ । पहिलो, हत्याराहरुलाई तत्काल समातेर कारवाही गर्नुस् । दोस्रो, यस्तो परिस्थिति आउनुको दोषी प्रधानमन्त्री पुष्पकमल दाहाल र गृहमन्त्री (तपाईँ) हो । तपाईँहरुका उत्तेजक अभिव्यक्तिले यस्तो घटना भएको हो भन्यौँ । अझ हामीले उहाँलाई ‘तपाईँहरुका गैरजिम्मेवार अभिव्यक्तिका कारण सामाजिक सद्भाव भड्किएको छ’ भन्यौँ । उहाँलाई हामीले जिम्मेवार ठाउँमा बसेर जिम्मेवार अभिव्यक्ति दिनुहोला समेत भन्यौँ । मनोज पुन वा अरु–अरुतिर लगेर यो घटनालाई तोडमोड गर्ने काम भएको छ भनेर हामीले गृहमन्त्रीलाई सजग तुल्यायौँ ।

यो शृंखलाबद्ध घटना हो । केही दिनअघि पनि बुटवलमा एक जना व्यवसायीको हत्या प्रयास भएको थियो । हामीले गृहमन्त्रीलाई ‘बुढी मरी भन्दा पनि काल पल्कियो’ भनेर चिन्ता भएको भन्दै प्रष्ट भन्यौँ ।

तिवारी हत्याकाण्डमा गृहमन्त्रीको अभिव्यक्तिलाई दोषी ठह¥याउनुभएछ । कस्तो थियो उहाँको प्रतिक्रिया ?

उहाँले ‘तपाईँहरुका भनाइ सान्दर्भिक छन्, गृहमन्त्रालय हत्यारालाई जसरी पनि पत्ता लगाउने गरी अघि बढ्छ’ भन्नुभयो । उहाँले आज बेलुका पाँच बजेभित्र छानविन समिति गठन गर्ने भन्नुभएको थियो । गठन गर्नुभएको छ । हेरौँ, उहाँले कस्तो कदम अघि बढाउनु हुन्छ । हामी त्यहीअनुरुप अघि बढ्छौँ । उहाँले अनुसन्धान, जनपद सशस्त्रका प्रमुखलाई पनि बोलाउनुभएको थियो । मलाई लाग्छ, उहाँले यो घटनालाई सामान्य रुपमा लिनु हुने छैन । उहाँले सामान्य रुपमा लिनु भयो भने त्यसको नराम्रो मूल्य उहाँहरुले चुकाउनुपर्ने हुन्छ ।

सरकारले हत्यारा पत्ता लगाउन सकेन भने युवा संघले कस्तो कदम चाल्छ ?

युवा संघले आज लुम्बिनी बन्दको घोषणा नै गरेको छ । देशव्यापी रुपमा दिउँसो एकदेखि दुई बजेसम्म चक्का जामको पनि आयोजना गरेको छ । आज उच्चस्तरीय छानविन समिति गठन नभएको भए देशैभरि साँझमा राँके जुलुस निकाल्ने र भोलि नेपाल बन्द गर्ने तयारी थियो । सरकारले छानविन समिति गठन गरेको छ । अब सरकार कसरी अघि बढ्छ, त्यही अनुरुप युवा संघले कार्यक्रम अघि बढाउँछ ।

अर्कोतिर, आजै मेरो नेतृत्वमा युवा संघका पाँच जना पदाधिकारी बुटवल जादैछौँ । आजै हामी पीडित परिवारलाई भेट्दै छौँ । सम्भवतः भोलि उहाँको दाहसंस्कार हुनेछ । समग्रमा भन्दा सरकारको कदम हेरेर हामी रणनीति बनाउँछौँ ।

2 पटक पढिएको

    
        Loading...     
    

प्रतिक्रिया दिनुहोस

सम्बन्धित समाचार

        
            Loading...     
        

    अन्तरवार्ता

    समाचार