Presidential

उपनिर्वाचन : हालसम्म नेकपा–२१, कांग्रेस–७, राजपा–२, समाजवादी–२ वडामा विजयी


उपनिर्वाचन : हालसम्म नेकपा–२१, कांग्रेस–७, राजपा–२, समाजवादी–२ वडामा विजयी

काठमाडौं, १५ मंसिर । ३७ जिल्लामा ५२ पदका लागि भएको उपनिर्वाचनको परिणाम आउने क्रम जारी छ । उपनिर्वाचनको परिणाम आधाआधी नतिजा आइसकेको छ ।

३७ जिल्लाका विभिन्न तहमा भएको निर्वाचनमा गुल्मी, भोजपुर, खोटाङ, काभ्रे, बाग्लुङ, लम्जुङ, कञ्चनपुर, रोल्पा, सल्यान लगायतका जिल्लामा भएको उपनिर्वाचनमा २१ स्थानमा सत्तारूढ नेपाल कम्युनिष्ट पार्टी (नेकपा) निर्वाचित भएको छ । निर्वाचन भएका ४३ वडामध्ये नेकपाले २२ स्थानमा विजय हासिल गरिसकेको छ ।

सत्तारुढ नेकपा २१ ठाउँमा विजयी
शुरूमा कांग्रेसले जितेको प्रचार भएको बाजुराको त्रिवेणी गाउँपालिका–१ मा नेकपाले जित हासिल गरेको छ । त्रिवेणी–१ मा नेकपाका उम्मेद्वार मनराजे बुढाले ३६७ मत ल्याएर विजय हासिल गरेका छन् । कांग्रेसका उमेदवार खकेन्द्रबहादुर चदारले ३४७ मत पाएका छन् । नेकपाका उम्मेद्वार २० मतको झिनो अन्तरले विजयी भएका हुन् ।

फिदिम नगरपालिका–१ मा नेकपाका गजाधर भट्टराई एक हजार ४४६ मत प्राप्त गरी विजयी भएका छन् । अछामको मेल्लेख गाउँपालिका–५ मा नेकपाका विजयी भएको छ । सिरहाको कल्याणपुर नगरपालिका–१२ मा नेपकाका उमेदवार दिलीपकुमार यादव निर्वा्चित भएका छन् ।
रामेछापको उमाकुण्ड गाउँपालिका–५ मा नेकपाका कुलबहादुर बस्नेत ७६९ मत ल्याएर विजयी भएका छन् । कांग्रेसका उमेदवारले ३८० मत प्राप्त गरे । समाजवादीले १०, राप्रपाले ५ र १० मत बदर भएको छ ।

बाँकेको कोहलपुर नगरपालिका– ५ मा नेकपाका रामशरण थारू निर्वाचित भएका छन् । उनले १५२ मत ल्याएर साविक विजेता काग्रेसलाई पराजित गरे । कांग्रेसका श्रीकृष्ण थारुले १३४ मत ल्याए । यसअघि त्यहाँ काङ्ग्रेस निर्वाचित भएको छ ।

संखुवासभाको खाँदबारी नगरपालिका–१३ मा नेकपाका उम्मेद्वार भरतकुमार घिमिरे निर्वाचित भएका छन् । घिमिरेले ७६९ मत प्राप्त गरेका छन् । उनले काङ्ग्रेसका उम्मेदवार विक्रम गुरूङलाई पराजित गरेका छन् । गुरूङले ४६७ मत प्राप्त गरेका छन् ।

भोजपुरको पौवादुङ्मा नगरपालिका–१ मा नेकपाका उम्मेदवार जितेन्द्र राई निर्वाचित भएका छन् । उनले ६१९ मत ल्याए भने कांग्रेसका उम्मेदवार सम्मरबहादुर कार्कीले २५४ मत ल्याएका छन् ।

बाग्लुङ बडिगाड गाउँपालिका–२ मा नेकपाका उम्मेद्वार ढालप्रसाद शेरचन ७०४ मत प्राप्त गरी निर्वाचित भएका छन् भने उनका प्रतिद्वन्द्वी कांग्रेसका उम्मेद्वारले ४१२ मत प्राप्त गरेका छन् ।

काठमाडौंको दक्षिणकाली नगरपालिका–३ को उपनिर्वाचनमा सत्तारूढ दल नेकपाका उम्मेदवार शिवभक्त बलामी निर्वाचित भएका छन् । उनले ६१८ मत प्राप्त गरे । कांग्रेसका उम्मेद्वारले २७८, राप्रपा (संयुक्त) ले १०७ र राप्रपाले ७ र २९ मत बदर भएको बताइएको छ ।

धुलिखेल नगरपालिका–२ को उपनिर्वाचनमा पनि नेकपा विजयी भएको छ । नेकपा उम्मेद्वार देवप्रसाद कोइरालाले ८६८ मत प्राप्त गरेका छन् । काङ्ग्रेसका उम्मेदवार दर्णबहादुर खत्रीले ५८२, राप्रपा (संयुत्त) का उमेदवार बासु थापा ले ६ मत प्राप्त गरेका छन् ।

यस्तै सिन्धुपाल्चोक इन्द्रावती गाउँपालिका–८ को वडाध्यक्षको उपनिर्वाचनमा नेकपा विजयी भएको छ । रिक्त वडाध्यक्ष पदको उपनिर्वाचनमा नेकपाका उम्मेद्वार केदारप्रसाद आचार्यले ७१२ मत ल्याएर विजयी भएका छन् । उनका निकटतम प्रतिद्वन्द्वी काङ्ग्रेसका राले तामाङले ४३१ मत प्राप्त गरेका छन् ।

पशुपति शमशेर नेतृत्वको राप्रपा (संयुक्त) ले १२, कमल थापा नेतृत्वको राप्रपाले ३ र ९ मत बदर भएको निर्वाचन आयोगले जानकारी दिएको छ । अघिल्लो निर्वाचनमा त्यहाँ कांग्रेस निर्वाचित भएको थियो ।

यस्तै सल्यानको कुमाखमालिका गाउँपालिका–५ को वडाध्यक्ष निर्वाचनमा नेकपाका उम्मेदवार धर्मे बुढाथोकी निर्वाचित भएका छन् । कुल एक हजार १२४ मत खसेकोमध्ये बुढाथोकीले ७९२ मत ल्याए भने निकटतम प्रतिष्पर्धी काङ्ग्रेसका खडकबहादुर बुढाथोकीले २५१ मत ल्याएको निर्वाचन अधिकृतको कार्यालयले जानकारी दिएको छ ।

लम्जुङ सुन्दरबजार नगरपालिकामा नेकपाका उम्मेद्वार विजयी भएका छन् । वडा नम्बर २ को रिक्त वडाध्यक्ष पदमा शनिबार भएको उपनिर्वाचनमा नेकपाका उम्मेदवार नवीन श्रेष्ठ विजयी भएका छन् । उनले ९९३ मत ल्याए । प्रतिद्वन्द्वी नेपाली कांग्रेसका उम्मेद्वार प्रकाश सेढाइले ४८२ मत ल्याएका छन् ।

सोही निर्वाचनमा राप्रपाले १६ र स्वतन्त्र उम्मेद्वारले १२ मत प्राप्त गरेका छन् । १० मत बदर भएको निर्वाचन अधिकृतको कार्यालयले जानकारी दिएको छ । पुनर्वास नगरपालिका–३ मा पनि सत्तारूढ नेकपा नै विजयी भएको छ । खानेपानीमन्त्री बिना मगरको वडा समेत रहेको पुनर्वास–३ मा ९२४ मत खसेकामध्ये ५२८ मत ल्याएर कृष्णबहादुर तामाङ निर्वाचित भएका छन् । काङ्ग्रेसका दीपबहादुर तामाङले ३९० मत प्राप्त गरेका छन् ।

यसअघि रोल्पाको विद्रोही थवाङमा नेकपा नै निर्वाचित भएको थियो । विरलै मताधिकार प्रयोग गर्ने विद्रोही उपनाम पाएको थवाङमा १५४ मत प्राप्त गरी नेकपाका जनकबहादुर बुढामगर निर्वाचित भएका थिए । प्रतिद्वन्द्वी नेपाली काङ्ग्रेसका कमलबहादुर रोकामगरले २६ मत प्राप्त गरेका थिए । यद्यपि त्यहाँका ८६ प्रतिशत मतदाताले मतदान नै गरेनन् ।

खोटाङको साकेला गाउँपालिका–३ मा पनि नेकपा निर्वाचत भएको छ । त्यहाँ नेकपाकी उम्मेद्वार शिवकला राई विजयी भएकी छन् । डोटीको आदर्श गाउँपालिका–२ मा नेकपाका उम्मेदवार रामबहादुर बोहोरा निर्वाचित भएका छन् । त्यस्तै रुरु गाउँपालिका– २ गुल्मीमा पनि नेकपा निर्वाचत भएको छ । त्यहाँ गिरिप्रसाद सिञ्जाली ८०२ मत ल्याएर निर्वाचित भएका छन् । प्रतिष्पर्धी काङ्ग्रेसका वेदप्रसाद दर्लामीले ७२७ मत ल्याएका छन् ।

पूर्वी नवलपरासीको बौंदीकाली गाउँपालिका–५ मा पनि नेकपाका खिमबहादुर खरुमगर निर्वाचित भएका छन् । उनले ३६७ मत पाए भने प्रतिष्पर्धी काङ्ग्रेसका तुलबहादुर रानाले २११ मत पाएका छन् ।

डोटीको आदर्श गाउँपालिकामा नेकपाका उम्मेदवार रामबहादुर बोहोरा निर्वाचित भएका छन् । उनले काङ्ग्रेसका महादेव साउदलाई पराजित गरे । साउदले ६५६ मत प्राप्त गरे ।
७ ठाउँमा कांग्रेस विजयी
कांग्रेसले बैतडीबाट विजयीको शुरूआत गरेको थियो । बैतडीको सुनर्या गाउँपालिका–१ मा कांग्रेसका गजेन्द्रबहादुर चन्द ४ मत बढीले विजयी भएका छन् । उनले २१९ मत ल्याएर नेकपाका उम्मेद्वारलाई पछि पारेका छन् ।

बाराको गढिमाई नगरपालिका–२ मा पनि काङ्ग्रेस निर्वाचित भएको छ । त्यहाँ नेपाली काङ्ग्रेसका उम्मेदवार ७७१ मत ल्याउँदा नेकपाका उम्मेदवारले ५९६ मत प्राप्त गरे । अर्घाखाँची मालारानी गाउँपालिका–३मा काङ्ग्रेसका उम्मेदार शोभाखर खनाल निर्वाचित भएका छन् । उनले १ हजार १५९ मत प्राप्त गरे । नेकपाका उम्मेदवारले १ हजार ५३ मत पाएका छन् ।

चितवनको भरतपुर महानगरपालिका–१६ मा काङ्ग्रेसका उमेदवार अमृतराज हमाल निर्वा्चित भएका छन् । अमृतले ३ हजार १ सय ८३ मत प्राप्त गरे । निकटतम प्रतिष्पर्धी नेकपाका भक्तराज हमालले २ हजार ८७५ मत ल्याएका छन् । गत निर्वाचनमा यहाँ एमालेका उम्मेदवार चतुरमान गुरूङ निर्वाचित भएका थिए ।

चितवनकै खैरहनी–५ मा काङ्ग्रेसकै प्रतीमा कार्की निर्वाचित भएकी छन् । खैरहनी नगरपालिका–४ नम्बर वडाको उपनिर्वाचनमा पनि काङ्ग्रेसकै उम्मेदवार देवबहादुर बस्नेत विजयी भएका छन् । उनले १ हजार १३८ मत ल्याएर नेकपाका बेदबहादुर अधिकारीलाई पराजित गरेका छन् । अधिकारीले ९८६ मत प्राप्त गरेका छन् । बैतडीको दोगडा केदार गाउँपालिका–४ मा नेपाली काङ्ग्रेसका सुरेन्द्रप्रसाल भट्ट निर्वाचित भएका छन् ।

घोराही नगरपालिका–१६ मा काङ्ग्रेस निर्वाचित भएको छ । त्यहाँ नेकपाले ३७८ मत प्राप्त गरी त्यो वडा गुमाएको छ । अघिल्लो निर्वाचनमा नेकपा विजयी भएको थियो ।
समाजवादी पार्टी–२ स्थानमा विजयी
समाजवादीले सर्लाहीको हरिपुर्वा नगरपालिका–१ वडामा जित हात पारेको छ । हरिपुर्वामा समाजवादी पार्टीका श्यामबाबुले रायले ३४७ मत ल्याएर जिते । प्रतिष्पर्धी राजपाका रामविश्वास रायले ३२८ मत ल्याए ।

नेकपाका उम्मेदवार दोस मोहम्द अन्सारीले पनि उत्तिकै ३२८ मत ल्याएका थिए । चौथो भएको जनमत पार्टीले ५२ र पाँचौं कांग्रेस पार्टीले २३ मत ल्याएको छ ।

पर्साको सखुवा प्रसौनी गाउँपालिका–५ मा समाजवादी पार्टी विजयी भएको छ । समाजवादी पार्टीका रूपलालकुमार यादवले १ हजार ३१ मत ल्याएका छन् । प्रतिष्पर्धी काङ्ग्रेसका असेशरप्रसाद यादवले ८११ मत पाए । नेकपाका उदयशङ्करप्रसाद रौनियारले २३२ मत पाए ।
राजपाको–२ ठाउँमा जीत
राष्ट्रिय जनता पार्टीले महोत्तरीको मटिहानी नगरपालिका–६ मा जितेको छ । मटिहानी–६ मा राजपाका उम्मेदवार रामबाबु नायक विजयी भएका छन् । उनले ३०१ मत ल्याए । प्रतिद्वन्द्वी नेकपाका मोहम्मद जाकिर अन्सारीले २७१ मत ल्याउँदा काङ्ग्रेसले दोहोरो अङ्क कटाउन सकेन । जम्मा २४ मत ल्यायो ।

सप्तरीको छिन्नमस्ता गाउँपालिका–७ को वडाध्यक्षको उपनिर्वाचनमा राजपा निर्वाचित भएको छ । राजपाकी प्रमिलादेवी यादवले ५४० मत ल्याएर नेकपाका उम्मेदवार अच्छेलाल यादवलाई पराजित गरिन् । अच्छेलालले ५२९ मत ल्याएका छन् । कांग्रेसले त्यहाँ दोहोरो अङ्क कटाउन सकेन । काङ्ग्रेसका उम्मेदवार शिवनारायण मण्डलले १५ मत ल्याएका छन् ।

    
        Loading...

प्रतिक्रिया दिनुहोस

सम्बन्धित समाचार

    
        Loading...     
    

अन्तरवार्ता

समाचार