Presidential

कलङ्की मालपोत नमुना कार्यालय घरमै बसेर पनि सेवा पाइने


कलङ्की मालपोत नमुना कार्यालय घरमै बसेर पनि सेवा पाइने

काठमाडौँ,  ५  असार । घरजग्गाको कारोबार गर्दा सेवाग्राहीले महिनौँसम्म मालपोतका कोठा÷कोठा धाउनुपर्ने अवस्था अन्त्य भएको छ । नमुना मालपोत कार्यालय कलङ्कीबाट अब सेवाग्राहीले घरमै बसेर आफ्नो घरजग्गाको विस्तृत विवरण पाउन सक्नेछन् ।  कुनै पनि जग्गाधनीले मालपोत कार्यालयबाट युजर नेम र पासवर्ड लिएर आफ्नो घरजग्गाको स्टेटमेन्ट जहाँसुकैबाट हेर्नसक्ने व्यवस्था मिलाइएको छ । घरैमा बसेर इन्टरनेटबाट लिखत तयार पारी अनलाइनबाटै विवरण पेस गर्न सक्ने व्यवस्था मिलाइएको जानकारी दिँदै भूमि व्यवस्थापन तथा अभिलेख व्यवस्था विभागका महानिर्देशक गोकर्णमणि दुवाडीले भन्नुभयो, “सक्कल कागजात लिएर जग्गा लिने र दिने मात्र कार्यालय आएर सेवा दिनसक्ने प्रणाली ल्याइएको छ । सेवाग्राहीले कम समयमा सेवा लिन सक्ने छन् । ”
कामका लागि मालपोत पुगेका सेवाग्राहीले पनि मालपोत कार्यालयको प्रवेशद्वारमा रहेको सहायता कक्षबाटै सम्पूर्ण प्रक्रियाका बारेमा जानकारी र एकल सेवा बिन्दुबाट सेवासमेत पाउने भएका छन् । महानिर्देशक दुवाडीले सेवाग्राहीका लागि सहज व्यवस्था गरिएको जानकारी दिँदै थप्नुभयो, “सहायता कक्षबाट कागजात रुजु गरी टोकन दिइने छ । यसका आधारमा सेवाग्राही सम्बन्धित कोठामा जान सक्ने छन् । कार्यकक्ष पारदर्शी बनाइँदै ओपन अफिस सिस्टम लागू गर्ने प्रयत्न गरिएको छ । एकल सेवा बिन्दु अवलम्बन गरिएको छ । सेवाग्राहीले एउटै कोठाबाट सबै सेवा लिनसक्ने व्यवस्था मिलाइएको छ । कार्यालयमा रहेको प्रतीक्षालयमा सेवाग्राहीलाई आवश्यक सूचना दिन टेलिभिजनको समेत व्यवस्था गरिएको छ । ”
सरकारले अनलाइन सिस्टम लागू गर्दै पहिलो नमुना कार्यालयका रूपमा कलङ्कीबाट सेवा शुभारम्भ गरेपछि यो सेवा सुरु भएको हो । यो नमुना मालपोतको प्रधानमन्त्री केपी शर्मा ओलीले बुधबार उद्घाटन गर्नुभयो । त्यस क्रममा उहाँले आधुनिक मालपोत कार्यालयमार्फत सबैलाई सहज सेवा दिन लागिएकोप्रति खुसी व्यक्त गर्नुभयो । प्रविधिको प्रयोगले काम पारदर्शी र सहज हुने र यसबाट राष्ट्रिय ध्येय र आकाङ्क्षासमेत पूरा हुने प्रधानमन्त्रीको भनाइ छ ।
काठमाडौँको साँखु, पाँचथर र इलाम जिल्लामा यसै वर्षदेखि नमुना मालपोत कार्यालय सञ्चालन गर्ने सरकारको योजना छ । देशभरका २२ वटा मालपोत कार्यालयमा सीसीटीभी जडान गरिसकिएको छ । कुल १३१ भूमिसुधार तथा मालपोत कार्यालयमध्ये ६६ वटा कार्यालयमा ल्यान्ड रेकर्ड इन्फरमेसन म्यानेजमेन्ट सिस्टम लागू गरिसकिएको छ । त्यसबाट जग्गाको कारोबार अनलाइन हुने, केन्द्रीय अभिलेख तयार हुने, राजस्व गणनामा एकरूपता आउने, विभिन्न प्रतिवेदन हेर्न सकिने, जग्गाको कारोबार गर्दा सम्बन्धित जग्गाधनीको मोबाइलमा म्यासेज जाने पनि उहाँले जानकारी दिनुभयो । कलङ्की मालपोत कार्यालयका सबै स्रेस्ताको स्क्यानिङ भइसकेको छ ।
त्यसैगरी सेवाग्राहीका लागि गुनासो सुन्ने व्यवस्थासमेत गरिएको छ । सुधारिएको फारामहरू बेवसाइटमा उपलब्ध गराइएको छ । कार्यालयलाई अपाङ्गमैत्री बनाइएको छ भने स्तनपान कक्षको समेत व्यवस्था गरिएको छ ।

विकास र सेवा प्रवाहमा प्रविधि प्रयोग गर्न आह्वान

प्रधानमन्त्री केपी शर्मा ओलीले विकास र सेवा प्रवाहमा प्रविधिको प्रयोग गर्न आह्वान गर्नुभएको छ । बुधबार काठमाडौँ कलङ्कीको नमुना मालपोत कार्यालय उद्घाटनमा आयोजित कार्यक्रममा प्रधानमन्त्रीले यस्तो आह्वान गर्नुभएको हो ।
सबै क्षेत्रको आधुनिकीकरण आवश्यक छ भन्दै उहाँले भन्नुभयो, “म सबैलाई आग्रह गर्न चाहन्छु, आधुनिकीकरणको काममा लागौँ । विकास र सेवाका प्रयासहरूमा प्रविधिको प्रयोगमा जोड दिएर अगाडि बढौँ । आधुनिक ढङ्गले विकास गरेर छिटो अगाडि बढौँ । ”
प्रविधिको प्रयोगबाट सेवामा सहजता, सुगमता, पारदर्शिता र तीव्रता आउने स्पष्ट पार्दै प्रधानमन्त्री ओलीले प्रविधिको प्रयोगले उत्पादन र उत्पादकत्व बढ्नुका साथै उत्पादन कार्यमा तीव्रता आउने विश्वास व्यक्त गर्नुभयो ।
भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले नमुना मालपोत कार्यालय कलङ्कीको मोडेललाई देशभरि लग्न लागिएको जानकारी दिँदै थप्नुभयो, “एउटै कामका निम्ति डेस्क डेस्कमा धाउनुपर्ने अवस्था अब अन्त्य भएको छ । एक ठाउँबाट बुझाएपछि काम सकेर अर्को ठाउँबाट बुझेर जाने सिस्टम बनाएका छौँ । ” अनलाइन सेवाले राजस्व वृद्धि भएको उहाँको भनाइ छ ।गोरखापत्रबाट

    
        Loading...

प्रतिक्रिया दिनुहोस

सम्बन्धित समाचार

    
        Loading...     
    

अन्तरवार्ता

समाचार