Presidential

सडक र पुल निर्माण समयमा नगर्ने आठ ठेकेदारलाई कारवाही


सडक र पुल निर्माण समयमा नगर्ने आठ ठेकेदारलाई कारवाही

लहान, २ जेठ । सडक डिभिजन कार्यालय लहान सिरहाले सडक तथा पुल निर्माणको काम समयमा पूरा नगर्ने निर्माण कम्पनीमाथि कारवाही गरेको छ । सिरहासहित सप्तरी र उदयपुर जिल्लामा निर्माणाधीन सडक तथा पुल निर्माणको सम्झौता गरे पनि समयमा काम सम्पन्न नगर्ने आठ निर्माणसँग सम्बन्धित कम्पनीमाथि कारवाही गरिएको सडक डिभिजन कार्यालय लहानका प्रमुख वीरेन्द्रकुमार साहले जानकारी दिनुभयो ।

सम्झौताबमोजिम ठेक्काको काम शुरु नै नगरेको तथा कार्य शुरु भए पनि सन्तोषजनक प्रगति नदेखिएकाले मौखिक पत्र तथा सूचनामार्फत पटकपटक जानकारी गराउँदासमेत कार्य शुरु गर्नेतर्फ पहल नथालेपछि कारवाही शुरु गरिएको प्रमुख साहको भनाइ छ ।

सप्तरीको गिदेरी खोला पुल र महुली घाडन खोला पुलको ठेक्का लिएको पप्पु मृत सञ्जिवनी जेभी काठमाडौँमाथि कारवाही गरी दुवै ठेक्काबाट रु दुई करोड १८ लाख ७० रकम फिर्ता गराइएको छ भने सप्तरीको मुतनी खोला र सिरहाको सरस्वती खोलामा पुल निर्माणको ठेक्का लिएको रोशन कन्स्ट्रक्सन जनकपुरमाथि कारवाही गरी रु ५९ लाख ७० हजार फिर्ता गराइएको छ ।

सप्तरीको सुमन्दरी खोलामा पुल निर्माणको ठेक्का लिएको नीलगिरी निर्माण सेवा प्रालि बानेश्वर काठमाडौँमाथि समेत कारवाही गरी रु ४७ लाख ५० हजार रकम फिर्ता गराएको कार्यालय प्रमुख साहले बताउनुभयो । त्यस्तै अन्य तीन ठेक्काका ठेकेदारमाथि समेत कारवाही गरी रकम फिर्ताका लागि बैंकमा पत्र काटिएको जनाइएको छ ।

कम प्रतिस्पर्धामा ठेक्का लिएर लामो समयसम्म काम शुरु नगर्ने र गुणस्तरहीन काम गर्ने प्रवृत्ति बढेकाले त्यस्ता निर्माण कम्पनीमाथि निगरानी बढाइएको प्रमुख साहको भनाइ छ ।

प्रहरीद्वारा गोदाममा छापा, हरियो मटर र स्याउ बरामद

सिरहाको नवराजपुर गाउँपालिका–२ मझौरामा अवैध सामानको गोदाममा प्रहरीले छापामारी करीब रु एक लाख मूल्य बराबरको हरियो मटर तथा स्याउलगायतका सामान बरामद गरेको छ । प्रहरी कार्यालय सिराहाबाट खटिएको प्रहरी टोलीले गोप्य सूचनाका आधारमा विभिन्न व्यक्तिले घरगोठमा गोदाम बनाएर राखेको भन्सार छलीका अवैध हरियो मटर तथा स्याउ बरामद गरेको हो ।

प्रहरीले स्थानीय राजेशकुमार कामैतको गोठबाट १० बोरा हरियो केराउ तथा २५ कार्टुन स्याउ, अर्का स्थाजीय नागेन्द्र कामैतको गोठबाट २१ बोरा हरियो मटर तथा रमेश कामैतको पक्की घरबाट आठ बोरा हरियो मटर बरामद गरेको जिल्ला प्रहरी कार्यालय सिरहाका प्रवक्ता प्रहरी नायब उपरीक्षक माधवराज खरेलले जानकारी दिनुभयो ।

यस्तै अस्थायी प्रहरी पोष्ट भगवानपुर सिरहाको टोलीले भगवानपुर गाउँपालिका–२ गमरियास्थित भिक्री सडकखण्डमा जाँचका त्रममा भन्सार छलेर ल्याइएको करीब रु १४ हजार मूल्य बराबरको सामान बरामद गरेको छ । बरामद सबै समान आवश्यक कारवाहीका लागि जिल्ला भन्सार कार्यालय ठाडी सिरहामा बुझाइने प्रवक्ता खरेलले बताउनुभयो ।

    
        Loading...

प्रतिक्रिया दिनुहोस

सम्बन्धित समाचार

    
        Loading...     
    

अन्तरवार्ता

समाचार