Presidential

अमेरिकी एनआरएनमा चुनावी सरगर्मी सुरु


अमेरिकी एनआरएनमा चुनावी सरगर्मी सुरु

२६ असार । सदस्यता निक्र्योलसम्बन्धी लामो विवादलाई चिर्दै निर्वाचन समितिले अमेरिकी एनआरएन निर्वाचनको आगामी सन् २०१७–१९ कार्यकालका लागि निर्वाचन कार्यक्रम तय गरेको छ । आगामी अगष्ट महिनाको ११ र १२ तारिख निर्वाचन तय गरेसँगै नेतृत्व लिन इच्छुकहरुले गत जुलाई ८ तारिखको समयसीमाभित्रै मनोनयनपत्र दाखिला गरेका छन् ।

अमेरिकी डायस्पोरामा एनआरएनमार्फत नेतृत्व गर्न इच्छुक अनुहारहरु प्रष्ट रुपमा नेपाली राजनीतिकका दुई ठूला दल एमाले र कांग्रेस समूहमा ध्रुवीकृत हुन पुगेका छन् । टेक्सासमा बस्ने व्यापारी गौरी जोशीले एमालेका लागि अमेरिकाबाट सक्रिय भूमिका खेल्दै आएको समूहको नेतृत्व गरेका छन् ।

जोशीले अध्यक्ष पदमा उम्मेदवारी दिएसँगै उनले आफ्नो समूहमा एमालेको प्रवास संगठन प्रवासी नेपाली मञ्च, अमेरिकाका पूर्वअध्यक्ष सञ्जय थापा, अमेरिकाकै प्रवासी नेपाली मञ्च सम्बद्ध प्रीतिसागर खत्री, थलराज पन्त, बलराम थापाको साथमा अमेरिकाबाट एमालेकै संगठनका लागि प्रवासी नेपाली मञ्चमार्फत काम गर्दै आएका पुरुषोत्तम बोहरालाई साथमा लिएका छन् । त्यस्तै, गौरी जोशीले एमाले निकट वेदराज बस्नेत र उमा कार्की थापालाई पनि आफ्नो समूहमा राखेका छन् ।

उता, वर्तमान अध्यक्ष डा. केशव पौडेलले अधिकांश कांग्रेस समर्थकहरुलाई समूहमा राखेर अध्यक्ष पदमा पुनः उम्मेदवारी दिएका छन् । डा. पौडेलले जनसम्पर्क समितिका सल्लाहकार सुनिल साहलाई वरिष्ठ उपाध्यक्षमा छानेका छन् । उनले आफ्नो समूहबाट उपाध्यक्षमा जनसम्पर्क समिति अमेरिकाका सल्लाहकार भूवन आचार्य र कांग्रेस निकट राधा पौडेललाई समावेश गरेका छन् । त्यसैगरी जनसम्पर्क समिति अमेरिकाका संस्थापकद्वय टेक्सासबासी कृष्ण लामिछाने तथा डा. अर्जुन बञ्जाडेलाई कार्यकारी सदस्यका रुपमा डा. पौडेलले आफ्नो समूहमा राखेका छन् । २३ सदस्यीय कार्यसमितिका लागि डा. पौडेलले कांग्रेस समर्थक होम गौतमलाई सचिव तथा गोविन्द श्रेष्ठ र पशुपति पाण्डेलगायतलाई सदस्यमा समावेश गरेका छन् भने महासचिवमा बीआर लामालाई राखेका छन् ।

दोस्रो कार्यकालका लागि अध्यक्ष पदमा उम्मेदवारी दिएका डा. पौडेल नेविसंघको नेतृत्व तहमा पुगेका व्यक्ति हुन् । उनको प्यानलबाट उम्मेदवारी दिने प्रायः सबै नेपाली कांग्रेस निकटका छन् भने जोशीको प्यानलमा भने अधिकांश एमाले एवम् वामपन्थी विचारधाराप्रति आस्था र विश्वास राख्ने व्यक्तिहरुको बाहुल्यता रहेको हुनाले जोशीले वामपन्थी धारको नेतृत्व गर्ने देखिएको छ ।

डा. केशव पौडेल, गौरी जोशीसँगै कृष्ण पोखरेल, रविना थापा, रामसी पोखरेलसमेत अध्यक्षमा उम्मेदवारी दिएका छन् । अध्यक्षमा उम्मेदवारी दिएका कृष्ण पोखरेल भने एक कार्यकाल पनि कार्यसमितिमा बसेर काम नगरेका कारण गौरी जोशीको उम्मेदवारी रद्द भएको खण्डमा च्याँखे थाप्ने दाउमा रहेको बताइन्छ । उता, रविना थापा र रामसी पोखरेल भने क्षेत्रीय संयोजक र क्षेत्रीय उपसंयोजक पद हात लाग्ने ग्यारेन्टी भए उम्मेदवारी फिर्ता लिने मनस्थितिमा रहेको बुझिएको छ ।

    
        Loading...

प्रतिक्रिया दिनुहोस

सम्बन्धित समाचार

    
        Loading...     
    

अन्तरवार्ता

समाचार