Presidential

लाजिम्पाटमा मन्त्री खोज्नेको ताँती, मन्त्री बनाउन रकम उठाएपछि…


लाजिम्पाटमा मन्त्री खोज्नेको ताँती, मन्त्री बनाउन रकम उठाएपछि…

मन्त्रिपरिषद् विस्तारको चर्चासँगै माओवादीबाट मन्त्री बन्न अध्यक्ष प्रचण्डसमक्ष रोइकराई गर्नेहरुको ताँती लागेको छ । कैलालीका हरि ज्ञवाली ‘अखण्ड’ ले ०७० को मुखमा वैद्य समूह छाडेको फल माग्न हुल लिएर लाजिम्पाटमा धर्ना कसिरहेको बताइन्छ । स्रोतका अनुसार पूर्वसामान्य प्रशासनमन्त्री रेखा शर्मा पनि त्यही लाइनमा छिन् ।

उमेश यादव र जाकिर हुसैनसमेत कोही मधेसी त कोही मुस्लिमको प्रतिनिधित्व गर्छु भन्दै दौडधूपमा छन् । यसरी आकांक्षा पोख्नेहरु धेरै छन् तर नारायणकाजीले चाहिँ एकसूत्रीय ढंगले गिरिराजमणि पोखरेललाई स्वास्थ्यमन्त्रीमा दोहो¥याउनुप¥यो भनिरहेको स्रोत बताउँछ । आफू ऊर्जा मन्त्रालय चलाउन सक्षम रहेको दाबी गर्दै पूर्व जनमुक्ति सेना कमाण्डर महेन्द्रबहादुर शाही लाजिम्पाट पुगेका छन् । विश्वस्त स्रोतका अनुसार उनको नाम लगभग पक्का छ । लोकमानविरुद्ध महाभियोग प्रस्ताव पेश गर्न बिजुलीको पोल बाँड्ने भन्दै जनार्दन शर्मासँगै यी पनि सांसदको हस्ताक्षर संकलनमा खटिएका थिए । हाल प्रमुख सचेतक रहेका सल्यानका टेकबहादुर बस्नेत पनि संभावित उम्मेदवार हुन् । थाहै नपाई हस्ताक्षर गराए, झुक्याए भनेर लोकमान प्रकरणमा दुखेसो पोख्नेमध्येका हुन्, टेकबहादुर । माओवादीमा फेरि पनि वर्षमान पुन र जनार्दन शर्मा प्रभाकर नै हावी हुने र निर्णायक बन्ने देखिन्छ ।

आपूर्ति मन्त्रालयचाहिँ शिवकुमार मण्डललाई दिइने सम्भावना छ । ०७० सालमा २६ सिट प्रत्यक्षतर्फबाट जितेकामध्ये बाग्मती अञ्चलबाट बिउ जोगाउने रामेछापका श्याम श्रेष्ठ पनि सम्भाव्य अनुहार हो, सामान्य प्रशासन या वाणिज्य मन्त्रीका रुपमा शपथ खान पाउने । बाबुरामको खम्बाको रुपमा परिचय बनेको भए पनि नयाँशक्तितिर नलागेकी तनहुँकी आशा खनालले महिला, बालबालिका मन्त्रालय पाउने संभावना देखिन्छ ।

म्याडमलाई मन्त्री बनाउने भन्दै पैसो मागेपछि..

सरकार त फेरिनै नहुने, फलानो र चिलानो मन्त्री हुने भन्दै पैसा उठाउने गिरोह सल्बलाउने । ‘मन्त्री बन्नलाई माथि बुझाउनुपर्ने भयो’ भन्दै पैसा माग्ने र उक्त रकम मन्त्री भइसकेपछि अनुदान वा कुनै शीर्षकबाट मिलाएर दोब्बर फिर्ता गर्नेसम्मको शर्त राखिने ।

अहिले काठमाडौं प्रहरी परिसरको हिरासतमा यस्तै धन्दाका एकजना कमरेड जाकिएका छन्, जसलाई छुटाउन उपल्लोतहको शक्तिकेन्द्र नै सक्रिय छ । जनकपुरकी माओवादी सांसद प्रतीक्षा तिवारी मुखिया कृषि मन्त्री बन्ने भन्दै ताप्लेजुङका दीपेन्द्रकुमार शेर्पासँग पैसा उठाएका राजकुमार तामाङ हुन्, प्रहरी हिरासतमा जाकिने । माओवादी लडाकुका ब्रिगेड कमाण्डर र आजकल वाइसिएलमा काम गर्ने काभ्रेका उनले एयरपोर्टमा ताप्लेजुङ पाथिभरा नामक गेष्ट हाउस खोलेका दीपेन्द्रसँग कृषि मन्त्रालयबाट ५० लाख अनुदान दिलाइदिने भन्दै २० लाख रुपैयाँ ठगेका हुन् । हरिबोल गजुरेल कृषि मन्त्री हुँदा राधिका तामाङ राज्यमन्त्री थिइन् । राधिकासँग एकचोटि भेट पनि गराइदिए । भित्री मामिला नबुझेकी राधिकाले वाइसिएलका साथीले भेट्न ल्याएको भन्दै दीपेन्द्रसँग राम्रो मिजासमा बोलिन् । तर, उनको कार्यकालभरि न दिएको पैसा फिर्ता भयो, न अनुदान नै पाए । त्यसपछि अहिलेको सरकारमा जनकपुरकी प्रतीक्षा कृषिमन्त्री हुनेबित्तिकै काम गरिदिने बचन दिइयो । तर, दीपेन्द्रले प्रतीक्षालाई चिनेका छैनन्, देखेका र भेटेका पनि छैनन् ।

राजकुमारलाई प्रहरी हिरासतमा लैजाने अस्त्रचाहिँ अर्कै थियो । जागिरमा भौँतारिएका एक युवकलाई भरतपुर क्यान्सर अस्पतालको सेक्युरिटी गार्डमा सरकारी जागिर लगाइदिने भन्दै तीन लाख लिएका थिए । पैसा लिएर एकवर्षदेखि फरार थिए । न जागिर मिल्यो, न पैसा नै । त्यसपछि प्रहरीलाई उजुर गरेका हुन् । राजकुमारलाई प्रहरीले पक्राउ गरेपछि उनीबाट पीडित भएका झण्डै दर्जन व्यक्ति टेकु पुगेका छन् । त्यसक्रममा खुलासा भयो, सरकार फेरिनासाथ फलानो मान्छे मन्त्री हुन्छ, यस्तो गरिदिन्छु भन्दै पैसा उठाउनु उनको धन्दै रहेछ । यो कुरा चाल पाएपछि असार ३ गते मध्यरात भीषण आगलागी भई करोडौँको धनमाल क्षति भएको भक्तपुरस्थित यति कार्पेट उद्योगका कर्मचारीहरु पनि टेकुतिर ताँती लाग्न थालेका छन् । शेरबहादुर देउवा प्रधानमन्त्री हुनासाथ जनार्दन शर्मा गृहमन्त्री बने । राजकुमारले गरेको ठगीचाहिँ गृहकै नाममा, तर मन्त्रीलाई नमुछी । उनले प्रतीक्षा तिवारीलाई प्रचण्डले गृहराज्यमन्त्री बनाउन लागेको भन्दै राज्यमन्त्री बन्नासाथ क्षतिपूर्तिबापत ५० लाख रुपैयाँ उपलब्ध गराउने नाममा रकम उठाएका हुन् । दीपेन्द्रसँगचाहिँ रकम दिएको प्रमाण नै छ । उनले दरबारमार्गस्थित होटल रोयल सिंगीमा रकम दिएका थिए । त्यसदिन रकम दिँदै गर्दाको सिसिटिभी फुटेज पनि जाहेरीमा संलग्न गराएका छन् ।

यसबारे सांसद प्रतीक्षालाई सोध्दा उनले राजकुमारलाई चिनेको स्वीकारिन् । तर, रकम उठाउन पठाएको कुरालाई निराधार भनिन् । ‘अरुको नाम नलिएर तपाईंकै नाम किन लिए त ?’ भनी सोधिएको प्रश्नमा भनिन्, ‘कार्यकर्ताले नाम लिने नेताकै हो ।’ उनले आफूलाई यस्तो प्रश्न सोधिनुका पछाडि केही दलाल व्यापारीको हात रहेको बताइन् । ‘केही दलाल राजकुमारलाई देखाएर मेरो बद्नाम गर्न खोज्दैछन्, तपाईंलाई पनि तिनीहरुले नै भनेको हुनुपर्छ’ उनले भनिन्, ‘पैसा उठाएर मन्त्री बनिँदैन, मन्त्री त पार्टीले बनाउने हो ।’ ती दलाल व्यापारी भनिएका व्यक्ति को हुन् भन्नेबारे केही पनि बताइनन् ।

प्रहरी हिरासतमा राखिएका राजकुमारको रिहाईका लागि पूर्वमन्त्री सूर्यमान दोङले तीव्र दबाब दिइरहेको प्रहरीस्रोत बताउँछ ।
जनआस्थाबाट

    
        Loading...

प्रतिक्रिया दिनुहोस

सम्बन्धित समाचार

    
        Loading...     
    

अन्तरवार्ता

समाचार