चीनका यी दुई अति विशिष्ट व्यक्तित्वबाट नेपाल भ्रमण हुने :उपप्रधानमन्त्री महरा


४ भदौ । छिमेकी मित्रराष्ट्र चीनका यी दुई अति विशिष्ट व्यक्तित्वबाट निकट भविष्यमा हुन लागेको नेपाल भ्रमणलाई नेपालले उच्च प्राथमिकतामा राखेको छ । भ्रमणका लागि दुवै देशले आ–आफ्ना परराष्ट्रमन्त्रालयलाई तम्तयार (स्ट्यान्डबाई) रहन निर्देशनसमेत दिएका छन् ।

आफ्नो पाँचदिने चीन भ्रमण सकेर आज स्वदेश फर्किनुभएका उपप्रधानमन्त्री तथा अर्थमन्त्री कृष्णबहादुर महराले त्रिभूवन अन्तर्राष्ट्रिय विमानस्थलमा सञ्चारकर्मीसँग कुराकानी गर्दै चीनका राष्ट्रपति पिङ र प्रधानमन्त्री खछयाङले छिट्टै नेपाल भ्रमण गर्नुहुने जानकारी दिए ।

ती विशिष्ट व्यक्तित्वको भ्रमणको तिथिमिति तयार भयो ? भन्ने राससको जिज्ञासामा उनले भने, “भएको छैन, छिट्टै उच्चस्तरीय बैठक र सल्लाह गरी उहाँहरुको नेपाल भ्रमणको मिति तयार हुनेछ ।”

प्रधानमन्त्री पुष्पकमल दाहालको विशेषदूतका रुपमा उपप्रधानमन्त्री महराले साउन ३१ गतेदेखि भदौ ३ गतेसम्म चीनको भ्रमण गरेका थिए । भ्रमणका क्रममा उपप्रधानमन्त्री एवम् अर्थमन्त्री महराले चिनियाँ प्रधानमन्त्री खछयाङसँग भदौ १ गते बेइजिङमा विशेष भेटवार्ता गरेका थिए ।
सो अवसरमा चिनियाँ प्रधानमन्त्री लीले राष्ट्रपति र आफूले शीघ्र नेपाल भ्रमण गर्न उत्सुक रहेको उपप्रधानमन्त्री महरालाई जानकारी गराउनुभएको थियो । प्रधानमन्त्री लीले नेपालमा नयाँ संविधान जारी भएपछि राजनीतिक स्थायित्व र आर्थिक समृद्धिमा नयाँ ढोका खुलेको भन्दै नेपालको आर्थिक एवम् सामाजिक विकासमा चीनले दिँदै आएको सहयोगलाई निरन्तरता दिने बताएको उपप्रधानमन्त्री महराले जानकारी दिए ।

उनले भने, “चीनका प्रधानमन्त्री लीले आगामी दिनमा नेपाल र चीनकाबीचको आपसी सम्बन्धलाई नयाँ उचाइँमा पु¥याउन चाहेको बताए ।” प्रधानमन्त्री लीसँगको भेटमा उपप्रधानमन्त्री महराले नेपालको पछिल्लो राजनीतिक अवस्था र प्रम दाहालको सन्देश सुनाउनुभएको उनले सञ्चारकर्मीलाई बताए ।

प्रतिक्रिया दिनुहोस्