नेकपा विवाद : सहमति खोज्न नेपालको दौडधुप


काठमाडौं, १७ फागुन । सत्तारुढ दल नेकपाभित्र वामदेव गौतमलाई राष्ट्रियसभामा लैजाने कि नलैजाने भन्ने विवाद गहिरिँदै जाँदा प्रधानमन्त्री केपी ओलीलाई शीर्ष नेताहरुले सचिवालय बैठकको निर्णय कार्यान्वयन गर्न सुझाव दिएका छन् ।

सचिवालय सदस्य एवं वरिष्ठ नेता माधवकुमार नेपालले ओली र अन्य नेताहरुसँग समन्वय गर्दै सचिवालयको निर्णय कार्यान्वयन गर्न सुझाव दिएका हुन् ।

‘युवराज खतिवडालाई अर्थमन्त्रीमा निरन्तरता दिने र गौतमलाई राष्ट्रियसभामा लैजाने तहबाट छलफल अघि बढिरहेको छ। यो विषयमा प्रधानमन्त्री ओली र अन्य नेताहरु पनि सहमत हुने अवस्थामा पुग्नुभएको छ’, नेता नेपाल निकट स्रोतले भन्यो ।

नेकपा कार्यकारी अध्यक्ष पुष्पकमल दाहाल निवासमा शुक्रबार बिहान भएको छलफलबारे बालुवाटारमा नेपालले ओलीलाई जानकारी गराएका थिए । उनीहरुबीच करिब एक घण्टा कुराकानी भएको थियो । शीर्ष नेताहरुको सुझावपछि ओलीले दबाब महसुस गरिरहेको स्रोतले जनाएको छ । ‘नेता नेपालले ल्याएको सुझावपछि प्रधानमन्त्री अलि लचिलो बन्नुभएको छ, जसले गर्दा यही बाटो अवलम्बन हुने अवस्था बनेको छ’, बालुवाटार निकट स्रोतले भन्यो ।

दाहाल निवासको बैठकमा खतिवडालाई मन्त्रीमा पुनर्नियुक्ति गर्ने र गौतमलाई राष्ट्रियसभामा लैजानेगरी सहमति जुटाउने निर्णय भएको थियो । पार्टी अध्यक्षसमेत रहेका ओलीले गौतमलाई राष्ट्रियसभामा नलैजाने बताएपछि शुक्रबार बिहान शीर्ष नेताको छुट्टै बैठक बसेको थियो ।

बैठकमा कार्यकारी अध्यक्ष दाहाल, वरिष्ठ नेता झलनाथ खनाल, नेपाल, गौतम र नारायणकाजी श्रेष्ठ सहभागी थिए। बिहान करिब आठ बजेदेखि चलेको छलफल पार्टीमा पछिल्लो समय बढेको विवादमा केन्द्रित रहेको स्रोतको दाबी छ । बैठक १० बजे सकिएको थियो ।

सुरुमा दाहाल निवासमा खनाल पुगेका थिए। त्यसपछि नेपाल र गौतम पुगेका थिए। श्रेष्ठ ढिलो गरी पुगेका थिए । त्यसैगरी गौतम महासचिव विष्णु पौडेल आफ्नो घरमा आएर केही बेर छलफल गरेपछि निस्केका थिए ।

दाहाल निवासको बैठकमा युवराज खतिवडालाई अर्थमन्त्रीमा पुनर्नियुक्ति गर्ने र वामदेव गौतमलाई राष्ट्रियसभामा लैजानेगरी सहमति जुटाउने निर्णय भएको छ ।
पाँच नेताको बैठकमा गौतमलाई राष्ट्रियसभामा लैजाने र खतिवडालाई अर्थमन्त्रीमै कायम राख्ने सहमति गरिएको थियो । सोही सहमतिअनुसार नेपाल ओलीलाई भेट्न बालुवाटार पुगेका थिए ।

नेपालले बालुवाटारमा दाहाल निवासमा भएको छलफलको सन्देश सुनाएको स्रोतको दाबी छ ।
नेकपामा पछिल्लो समय नेता गौतमलाई राष्ट्रियसभामा लैजाने विषयमा तीव्र विवाद देखिएको छ ।

बुधबार बसेको नेकपा सचिवालय बैठकले सर्वसम्मत रुपमा गौतमलाई राष्ट्रियसभामा लैजाने निर्णय गरेको थियो । त्यो निर्णयप्रति अध्यक्ष ओली असन्तुष्ट छन् । उनले गौतमलाई राष्ट्रियसभामा मनोनयनका लागि सरकारले सिफारिस नगर्ने बताएपछि नेकपाभित्र विवाद चर्केको हो ।

ओली हालका अर्थमन्त्री खतिवडालाई नै राष्ट्रियसभामा निरन्तरता दिन चाहन्छन् । नेता खनालले भने पार्टी निर्णय कार्यान्वयन नगरे ओलीलाई प्रधानमन्त्रीबाटै हटाउनेसम्मको चेतावनी दिएका थिए । विवादले उग्र रुप लिएपछि नेपालले यो विषयमा समन्वय गर्दै आएका छन् । नेकपाभित्रको आन्तरिक कलह सार्वजनिक भएको बेला अध्यक्ष ओली बाहेकका शीर्ष नेताबीचको यस्तो बैठकलाई अर्थपूर्ण रुपमा हेरिएको छ । नागरिक दैनिकबाट

प्रतिक्रिया दिनुहोस्