पूर्वसभामुख नेम्वाङले पेश गरे २४ योजना


६ मंसिर । पूर्वसभामुख तथा इलाम क्षेत्र नं २ का सांसद सुवासचन्द्र नेम्वाङले निर्वाचन क्षेत्र पूर्वाधार विशेष कार्यक्रमअन्तर्गत जिल्ला विकास समितिमा आफ्नो निर्वाचन क्षेत्रमा २४ वटा योजना पेस गरेका छन् । आर्थिक वर्ष ०७३÷०७४ का लागि सरकारको बजेट वक्तव्यमा व्यवस्था गरेअनुसार प्रत्येक निर्वाचन क्षेत्रका निर्वाचत सांसदका लागि तीन करोडका दरले सरकारले दिने व्यवस्था भए बमोजिम निर्वाचित सांसद नेम्वाङले बजेट कार्यान्वयनका निम्ति २४ वटा योजना पेस गरेका हुन् ।

उनले जिल्लाको पश्चिमी क्षेत्रका आमचोक, फुएतप्पा, लुम्दे, गजुरमुखी इभाङको ग्रामीण विद्युतीकरणका लागि ५० लाख विनियोजन गरेका छन् । यसैगरी, बाँझो–२, चुलाचुली–८ र साकफाराको तोरीबारीको विद्युतीकरणमा १५ लाख विनियोजन गरेका छन् । त्यसबाहेक धेरै सडकमा १० लाख विनियोजन भएका छन् । केही सडक मर्मतमा १५ लाख छुट्याइएको छ ।

जीतपुर–आमबोटे–देनपा जोड्ने सडकका लागि १० लाख, प्रहरी चौकीको भान्साघर निर्माणका लागि १४ लाख, एकतप्पा–९ रुपटारमा निर्माणाधीन किराँत हाङसाम माङहिम (मन्दिर) निर्माणका लागि १० लाख, मङ्गलबारे बहुमुखी क्याम्पसको भौतिक निर्माणका लागि रु ११ लाख बजेट विनियोजन गरिएको छ । योजना छनोट गर्दा अधिकांश सांसदको रोजाइमा सडक नै पर्ने गरेको छ ।

प्रतिक्रिया दिनुहोस्