प्रचण्ड र मोदीको संयुक्त पत्रकार सम्मेलन, नेपाली प्रधानमन्त्रीले भने– ‘द्विपक्षीय सम्बन्ध र आपसी हितमा प्रतिबद्ध’


 

३१ भदौ । भारतको राजकीय भ्रमणमा रहेका प्रधानमन्त्री पुष्पकमल दाहालले आफ्नोे सरकार भारतसँगको द्विपक्षीय सम्बन्ध र आपसी हित अभिवृद्धिमा प्रतिबद्ध रहेका बताएका छन् । उनले यस क्षेत्रमा विद्यमान सम्भाव्यताबाट दुवै मुलुकले लाभ लिनुपर्ने पनि बताएका छन् ।

भारत पुगेको दोस्रो दिन शुक्रबार प्रधानमन्त्री दाहालले भारतीय समकक्षी नरेन्द्र मोदीसँगको संयुक्त पत्रकार सम्मेलनका क्रममा दुवै मुलुकको दिगो आर्थिक विकासका लागि आपसी साझेदारी आवश्यक रहेकामा जोड दिए । प्रधानमन्त्री दाहालले भने –‘विकासका लागि शान्ति र राजनीतिक स्थिरता आवश्यक छ ।’

प्रधानमन्त्री दाहालले दुवै मुलुकका प्रतिनिधिमण्डलबीच पञ्चेश्वर बहुउद्देश्यीय परियोजना अघि बढाउन विस्तृत परियोजना प्रतिवेदन (डिपिआर) हुलाकी सडक, विद्युत् प्रसारण लाइन सम्झौता, रेलवे सेवा, जलविद्युत् परियोजना सम्बन्धमा भएका सम्झौता कार्यान्वयनमा महत्वपूर्ण छलफल भएको बताए ।

संविधान कार्यान्वयनको चरणमा रहेको जानकारी गराउँदै प्रधानमन्त्री दाहालले दुवै मुलुकबीच हुने उच्चस्तरको राजनीतिक भ्रमणले सम्बन्ध थप प्रगाढ हुने विश्वास व्यक्त गर्दै निकट भविष्यमै भारतका राष्ट्रपति र प्रधानमन्त्रीको नेपाल भ्रमण हुने अपेक्षा पनि गरे । भारतको आर्थिक विकासबाट नेपालले प्रेरणा लिने बताउँदै उनले आर्थिक समृद्धिका लागि व्यापार र पारवहन सम्पर्क सञ्जाल आवश्यक रहेकामा जोड समेत दिएका थिए ।

प्रतिक्रिया दिनुहोस्