प्रधानमन्त्रीलाई दिनु भन्दै सल्लाहकारलाई बुझाए युवा विद्यार्थीले चिठ्ठी


४ पुस । संयुक्त विद्यार्थी मोर्चाले संविधान संशोधनको प्रस्ताव राष्ट्रको हितमा नरहेको भन्दै त्यसलाई फिर्ता लिन प्रधानमन्त्री पुष्पकमल दाहाल ‘प्रचण्ड’ लाई आज ध्यानाकर्षण गराएका छन् ।

सिंहदरबारस्थित प्रधानमन्त्रीका प्रमुख राजनीतिक सल्लाहकारमार्फत प्रधानमन्त्री दाहाललाई ध्यानाकर्षणपत्र बुझाइएको हो । देशभरबाट विद्यार्थीले प्रधानमन्त्रीलाई सो प्रस्ताव फिर्ता लिन लेखेका पत्रमध्ये केही पत्र समेत हस्तान्तरण गरिएको छ ।

अनेरास्ववियुका अध्यक्ष नवीना लामाले सरकारले ल्याएको संविधान संशोधन प्रस्तावप्रति प्रतिपक्ष दल तथा मधेसी मोर्चा असहमत रहेकाले त्यसलाई अविलम्ब फिर्ता गरी दलहरुको सहमतिबाट विकल्प खोज्नुपर्ने सुझाव दिनुभयो ।

नेपाल मजदुर किसान पार्टी निकट विद्यार्थी सङ्गठनका अध्यक्ष नीरज लवजूले मुलुकमा अङ्गीकृत नागरिकलाई देशको नेतृत्व दिने तथा हिन्दी भाषालाई राष्ट्रिय भाषा बनाउने विषय राष्ट्रियता विरोधी रहेकाले त्यसलाई अविलम्ब फिर्ता लिन माग गरिन् ।
नेकपा (एमाले), नेकपा (माले), राष्ट्रिय जनमोर्चा नेपाल, नेमकिपा निकट विद्यार्थी सङ्गठनलगायतले संविधान संशोधन प्रस्तावको प्रक्रियामा असहमत भई विभिन्न चरणका आन्दोलन गर्दै आएका छन् ।

पत्र बुझेपछि प्रधानमन्त्रीका प्रमुख राजनीतिक सल्लाहकार खनालले विद्यार्थीको माग प्रधानमन्त्रीलाई अवगत गराउने प्रतिबद्धता व्यक्त गरेका थिए ।
उनले जनताको लामो सङ्घर्षपछि प्राप्त भएको संविधानलाई कार्यान्वयन गर्न महत्वपूर्ण भएको बताउँदै त्यसका लागि संविधान संशोधन गर्नुपरेको यथार्थतालाई बुझ्न आग्रह गरेका थिए ।
‘संविधान संशोधन विधेयक अविलम्ब फिर्ताको माग गर्दै आन्दोलनरत युवा विद्यार्थी संघसंगठनद्वारा घोषित आन्दोलनका कार्यक्रम अन्तर्गत प्रधानमन्त्री प्रचण्डलाई राष्ट्रियताको पक्ष उभिन आह्वान गरेका छौँ,’ अनेरास्ववियु सचिव लामिछानेले भने, ‘युवा विद्यार्थीद्वारा लेखिएको खुलापत्र प्रधानमन्त्रीका प्रमुख राजनीतिक सल्लाहकारमार्फत हस्तान्तरण गरियो ।’ उनले हजारौँ चिठ्ठीहरु प्राप्त भएको भन्दै सबै बुझाउन सम्भव नभएकाले उनीहरुको भाव समेटेर बुझाएको जानकारी दिए ।  ‘हामीलाई प्रधानमन्त्रीको अनुहार हेर्न मन नलागेपछि सल्लाहकारमार्फत प्रधानमन्त्रीलाई चिठ्ठी पठाएका हौँ,’ लामिछानेले भने ।

प्रतिक्रिया दिनुहोस्