बैंक चलाउने सांसदहरुको अवरोधले बाफिया अलपत्र


काठमाडौं । नेपाल राष्ट्र बैंकबाट मस्यौदा भएर गएको विधेयक नै आउनुपर्नेमा सबैको मत रहे पनि बैंक तथा वित्तीय संस्थाहरूको अध्यक्ष र सञ्चालकसमेत रहेका केही सांसदको अवरोधका कारण बैंक तथा वित्तीय संस्थासम्बन्धी विधेयक (बाफिया) त्यत्तिकै अड्किएर बसेको छ । दसैंअघि नै सो विधेयक सदनमा पेस हुने अपेक्षा गरिए पनि केही सांसदहरूले चलखेल गरेका कारण रोकिन पुगेको हो ।

यसअघि व्यवस्थापिका–संसदको अर्थ समितिले पूर्ण सदनमा सो विधेयक पेस गरे पनि चौतर्फी रूपमा विरोध आएपछि पूर्वअर्थमन्त्री विष्णुप्रसाद पौडेलले पुनः छलफलका लागि समितिमै फिर्ता पठाएका थिए । तर, करिब तीन महिनासम्म समितिमा अड्किएपछि बाफियाबारे पुनः छलफल अगाडि बढेको थियो । समितिले पूर्वगभर्नर र बैंक तथा वित्तीय संस्थाहरूका स्टेकहोल्डरहरूसँग छलफल गरेर विधेयकमा संशोधन गरी सदनमा पेस गर्ने अपेक्षा गरिएको थियो । तर, समितिले पूर्वगभर्नर र बैंक तथा वित्तीय संस्थाका स्टेकहोल्डरहरूसँग छलफल गरेको दुई हप्ता बित्न लाग्दासमेत विधेयकबारे कुनै टुंगो लाग्न सकेको छैन ।

सूत्रका अनुसार बैंकका सञ्चालकसमेत रहेका उमेश श्रेष्ठ, गोपाल दहितलगायत केही सांसदहरूले विधेयकमा आफ्नो सरोकारलाई सम्बोधन नगरेको भन्दै निहुँ खोजेका कारण विधेयक त्यत्तिकै अड्किन पुगेको बताइन्छ । दसैंअघि नै विधेयक आउनुपर्नेमा ती सांसदहरूले लफडा झिकेका कारण विधेयक रोकिन पुगेको हो । विधेयकमाथि केही सांसदको अवरोध भएपछि समितिका सभापति प्रकाश ज्वाला पनि गृह जिल्ला सल्यानतिर गएको बुझिएको छ । समितिका एक सदस्य केदार सञ्जेलले भने दसैंअघि ल्याउन प्रयत्न गरे पनि आफूहरू असफल भएको बताए । उनले दसैंपछि भने विधेयक सदनमा पेस हुने सम्भावना रहेको बताए ।

यसैबीच, नेपाल राष्ट्र बैंकका गभर्नर डा.चिरञ्जीवी नेपाल हिजो अमेरिकातिर उडेका छन् । आगामी असोज २५ गतेसम्म अमेरिकामा हुने एक कार्यक्रममा भाग लिन उनी अमेरिका गएका हुन् । अमेरिका जानुभन्दा केही दिनअघि मात्रै उनी सपरिवार भुटान पुगेर फर्किएका थिए ।

प्रतिक्रिया दिनुहोस्