महानगरको पहलमा काठमाडौँका ६ स्थानमा एकै पटक फ्रि वाइफाई सेवा सुरु


काठमाडौँ, १७ भदौ । काठमाडौँ महानगरपालिकाले महानगरबासीलाई समयानुकुल प्रविधिमैत्री सेवा विस्तार गरी महानगरपालिकालाई डिजिटल र स्मार्ट सिटी बनाउने अभियानलाई तीव्र रुपमा अघि बढाएको छ ।

यसको सुरुवातमा काठमाडौं महानगरपालिकाले हनुमान ढोका, पशुपति, स्वयम्भू, बालाजु, बौद्ध र शंखपार्क क्षेत्र, मा आजदेखि फ्रि वाइफाई सेवा सुरु गरेको छ । फ्रि वाइफाई सेवा सुरुवातको उद्घाटना पसुपति क्षेत्रबाट गर्दै काठमाडौँ महानगरपालिकाका मेयर विद्यासुन्दर शाक्यले आफ्नो घोषित नीति अनुसार नै यस्तो कार्यक्रमको सुरुवात गरेको जानकारी दिए ।

उनले पसुपति क्षेत्र विकास कोषको सहयोगमा आज वल्र्डलिङ्क कम्युनिकेशनको सहकार्यमा फ्रि–वाईफाईको उद्घाटन गर्दै भने– ‘यो युग विज्ञान र प्रविधिको युग हो,’ उनले भने, ‘विज्ञान र प्रविधिलाई हामीले वेवास्था गर्ने होइन सदुपयोग गरेर नै अघि बढ्नुपर्छ ।’
उहाँले स्मार्ट सिटी अभियान अन्तरगत नै धर्मपथमा स्मार्ट पार्किङ भवन बनाउने तयारी सुरु भएको बताए ।
उनले भविश्यमा काठमाडौँ महानगरपालिकालाई नै फ्रि–वाईफाई महानगरपालिका बनाउने उद्घोष गरे । उनले महानगरका धार्मिक, सास्कृतिक स्थलहरुका बारेमा जानकारी लिन सजिलो होस भनेर एप्स समेत तयार गरेको पनि जानकारी दिए ।
आज उद्घाटन गरिएको क्षेत्रमा एक पटकमा वाइफाइका प्रयोगकर्ताको न्युनतम संख्यालाई आधार मानेर हरेक स्थानमा १० एमविपिएस व्याण्डविथ क्षमताको सेवा जडान गरिएको छ। जसमा पशुपति क्षेत्रमा एक्सेस प्वाइन्ट ११ वटा हुनेछन् भने बौद्धमा ४ वटा, शंखपार्कमा २ वटा, वालाजु वाइसधारा उद्यानमा ७ वटा, स्वयम्भूमा ५ वटा र वसन्तपुरमा ९ वटा हुनेछन् ।

प्रयोगकर्ताको दृष्टिले पशुपति क्षेत्रमा एक पटकमा २०० देखि ७०० जनासम्मले वाइफाइ प्रयोग गर्ने छन् । बौद्धमा २५० जनादेखि ५०० जना, शंख पार्कमा ५० देखि २०० जना, बालाजुमा २०० देखि ७०० जना, स्वयम्भूमा २०० देखि ३०० जना, बसन्तपुरमा २०० देखि ३०० जनासम्मले सेवा लिनेछन् । मेयर शाक्यले अहिले परिक्षण काल भएकाले दिनमा आठ घण्टा मात्र सञ्चालनमा ल्याउने पनि जानकारी दिए ।
प्रदेश सांसद नरोत्तम वैद्यले पनि सकारात्मक सोचका साथ कामको सुरुवात भएको भन्दै आफूहरुले सहयोग गर्ने जानकारी दिए ।

प्रतिक्रिया दिनुहोस्