मुखर्जीको स्वागतमा सिंगारियो जनकपुर, नागरिक अभिनन्दन हुँदै


१९ कात्तिक । भारतीय राष्ट्रपति प्रणव मुखर्जीको शुक्रबार हुने जनकपुर भ्रमणका लागि जनकपुरवासी निकै उत्साहित देखिएका छन् । मुखर्जीको स्वागत गर्न जनकपुरवासी निकै आतुर देखिएका हुन् । उनको स्वागतमा सारा जनकपुरलाई बेहुलीझैँ सिङ्गारिएको छ ।

मुखर्जीको स्वागतका लागि जनकपुरको मुख्य सडकमा स्वागतद्वार र दुवै देशका राष्ट्रिय झन्डाले सजाइएको छ । शुक्रबार बिहानैदेखि मानिसहरु मुखर्जीको स्वागतका लागि नेपाल र भारतका झन्डासहित प्रमुख चोकमा उभिएर तयारी अवस्थामा रहेका छन् । जनकपुर विमानस्थलदेखि राष्ट्रपति मुखर्जी सवार हुने मुख्य चोक, सडकमा स्वागत तथा सजावट गरिएको हो ।

यसैगरी, राष्ट्रपति मुखर्जीलाई स्वागत गर्न विद्यार्थी पनि सडकमा आउने भएका छन् । उनलाई स्वागत गर्न जनकपुरका २५ वटा निजी विद्यालयका चार हजारभन्दा बढी विद्यार्थी सडकमा नेपाल भारतको झन्डासहित उत्रिने प्याव्सन धनुषाका उपाध्यक्ष विश्वलाल सिंहले जानकारी दिए ।

प्याब्सन र एन प्याब्सनले संयुक्त रुपमा समन्वय गरी व्यवस्थापन पक्षसँग सहकार्य गरेर राष्ट्रपति मुखर्जीलाई स्वागत गर्न जनकपुरको विमानस्थलको अगाडि श्यामचोकदेखि शिवचोकसम्म दुवै छेउ विद्यार्थीले उभिएर झन्डा हल्लाई स्वागत गर्ने कार्यक्रम रहेको उनले बताए ।

स्वागतद्वारमा ‘भारतका महामहिम राष्ट्रपति प्रणव मुखर्जीलाई जनकपुरमा हार्दिक स्वागत छ’ लेखिएको छ । विमानस्थल, श्यामचोक, क्याम्पसचोक, मुरलीचोक, क्षेप्रका, तिरहुतिया गाछी, रामचोक लगायतका स्थानमा स्वागतद्वार बनाइएको छ । जानकी मन्दिरलाई सरसफाइ गरी नयाँ रङ्गरोगन गरिएको छ भने विशेष किसिमले झिलिमिली बत्ती तथा टेन्ट, झालर आदिले सजाएर झकिझकाउ पारिएको छ ।

त्यसैगरी, राष्ट्रपति मुखर्जीको भ्रमणको पूर्वसन्ध्यामा बिहीबार सुरक्षा व्यवस्थापनसम्बन्धी पूर्वाभ्यास गरिएको छ । नेपाली सेना, सशस्त्र प्रहरी तथा नेपाल प्रहरीको संयुक्त टोलीले जानकी मन्दिर तथा तिरहुतिया गाछीमा पूर्वाभ्यास गरेका धनुषाका प्रजिअ दिलीप चापागाईंले जनाए ।

राष्ट्रपति मुखर्जी शुक्रबार बिहान १० बजे जनकपुर आउने कार्यक्रम रहेको छ । विमानस्थलबाट उनी सिधा जानकी मन्दिर पुगी करिब २० मिनेट पूजाअर्चना गर्ने कार्यक्रम रहेको छ । त्यहाँबाट तिरहुतिया गाछी जाने कार्यक्रम छ, जहाँ जनकपुर उपमहानगरपालिकाका तर्फबाट कार्यकारी अधिकृत पुण्यप्रसाद लुइँटेलले उनलाई नागरिक अभिनन्दन गर्नुका साथै नगरको साँचो हस्तान्तरण गर्ने कार्यक्रम छ ।

जनकपुर उपमहानगरपालिका स्रोतबाट प्राप्त जानकारीअनुसार अभिनन्दन समारोहमा गृहमन्त्री विमलेन्द्र निधि तथा पर्यटन तथा नागरिक उड्डयनमन्त्री जीवनबहादुर शाही पनि सहभागी हुनेछन् । राष्ट्रपति मुखर्जीको अभिनन्दनका लागि मञ्च निर्माण गरिएको छ भने अभिनन्दन समारोहमा सहभागी हुने देशी तथा विदेशी पाहुना एवम् सर्वसाधारणका लागि भव्य पण्डाल निर्माण गरिएको छ । तिरहुतिया गाछीमा प्रवेश गर्न दुई ढोकाको व्यवस्था गरिएको छ ।

भारतीय राष्ट्रपति मुखर्जीको आगमनका क्रममा शान्तिसुरक्षाको व्यवस्थालाई कडा बनाइएको छ । नेपाली सेना, सशस्त्र प्रहरी, नेपाल प्रहरी तथा अनुसन्धान विभागका कर्मचारी चोकचोकमा खटाइएका छन् । अहिले जनकपुरको प्रमुख चोक तथा गल्लीगल्लीमा व्यापक मात्रामा सुरक्षाकर्मी परिचालन गरिएको देखिन्छ ।

प्रतिक्रिया दिनुहोस्